ექიმ ირმა მაკალათიას მხარდამჭერთა პეტიცია მისი შეწყალების თხოვნის განსამტკიცებლადა არის შექმნილი!გთხოვთ, წაიკითხეთ ტექსტი და თანხმობის შემთხვევაში ხელი მოაწერეთ!
პატივცემულო საზოგადოებავ, მოკლედ გვინდა გაცნობოთ, თუ რა ძალიან მძიმე ამბავი უდევს საფუძვლად ამ პეტიციას. ამბავი, რომელიც 8 წლის წინ დაიწყო: ახალგაზრდა ქალს, რომლის ფიზიოლოგიური მშობიარობა, ყველანაირი გართულების გარეშე ,მიიღო მეან-გინეკოლოგმა ირმა მაკალათიამ, ორი დღე არანაირი პრობლემა არ ჰქონია. ის იმყოფებოდა ყოველწუთიერი მეთვალყურეობის და ზრუნვის ქვეშ. პრობლემები დაიწყო მესამე დღეს, რომელთა მიზეზის დადგენა ვერანაირად ვერ მოხერხდა, მიუხედავად ყველანაირი ხელთ არსებული კვლევებისა და მედპერსონალის თავდაუზოგავი ძალისხმევისა. ამის გამო მისმა ექიმმა გადაწყვიტა, სასწრაფოდ გადაეყვანა მელოგინე სხვა კლინიკაში დიაგნოზის დასაზუსტებლად, სადაც მას ჩაუტარდა ოპერაცია. ექიმიც თან გაჰყვა, არ მოშორებია პაციენტს გვერდიდან და მის ნათესავებთან და ახლობლებთან ერთად ელოდებოდა, რომ ყველაფერი კარგად დასრულდებოდა. მოხდა საშინელება, პოსტოპერაციულ პერიოდში პაციენტი გარდაიცვალა. ტრაგედია გასცდა ოჯახს. მწარედ განიცდიდა მთელი მედპერსონალი, მთელი ჩვენი პატარა ქალაქი, სადაც ყველა ყველას იცნობს, ფიზიკურად და სულიერად განადგურებული ირმა ექიმი, რომელმაც მთელი სიმძაფრით გაითავისა მომხდარის ტრაგიზმი და პირად მარცხად აღიქვა იგი. უბედურება გაგრძელდა: ირმაზე დაიწყო სისხლის სამართლის დევნა, შედეგად პირველმა ინსტანციამ გამოუტანა პირობითი სასჯელი. საქმე გაგრძელდა სააპელაციო სასამართლოში, სადაც ძალაში დატოვეს პირველი ინსტანციის გადაწყვეტილება. საქმე გაგრძელდა უზენაესში, სადაც, ყველასთვის მოულოდნელად, მოსამართლემ გამოაცხადა გადაწყვეტილება- პატიმრობა წელიწადნახევარის ვადით და ირმა ექიმს, 8 წლის მერეც ჯერ კიდევ ვერ გამოსულს მომხდარის განცდებიდან, 3 წლის შვილის დედას, სასამართლო დარბაზშივე დაადეს ხელბორკილები და გადაიყვანეს საპატიმროში. ირმა ექიმს სახლში დარჩა 3 წლის მათე. ირმა ექიმის პიროვნული თვისებები, რომელიც ყველა ჩვენს ქალაქში მაცხოვრებლისთვის ცნობილია, გვაიძულებს თქვენი დახმარების თხოვნას. ერთადერთი სამართლებრივი გზა არსებობს, ხმა მივაწვდინოთ საქართველოს პრეზიდენტს ქალ-ნ სალომე ზურაბიშვილს და ვთხოვოთ მას, შეწყალების აქტის საფუძველზე დაუბრუნოს 3 წლის მათეს დედა და ჩვენ ჩვენი თანამოქალაქე და მეგობარი! კიდევ ერთხელ სამძიმარს ვუცხადებთ გარდაცვლილის ოჯახს და იმედს ვიტოვებთ, რომ მიუხედავად საკუთარი დიდი მწუხარებისა, მათაც გაუჩნდებად უბრალო ადამიანური სიბრალური ექიმის მიმართ, რომელსაც ყველაზე მეტად უნდოდა, რომ ქალი ოჯახში დაბრუნებულიყო თავის ჯანმრთელ ბიჭუნასთან ერთად!
თეა ჩახუნაშვილი დაუკავშირდით პეტიციის ავტორს.